మొదటి స్థానం ఎవరిది?

దేవుడు ఇశ్రాయేలీయులకు పది ఆజ్ఞలు ఇచ్చే ముందు ఒక ముఖ్యమైన విషయాన్ని గుర్తుచేశాడు. తానే వారిని ఐగుప్తు బానిసత్వం నుండి విడిపించానని చెప్పాడు.

ఇక్కడ మనం ఒక విషయాన్ని గమనించాలి. దేవుడు ఇశ్రాయేలీయులను విడిపించడానికి ముందు ఆజ్ఞలు ఇచ్చి, వాటిని పాటిస్తేనే విడిపిస్తానని చెప్పలేదు. ముందుగా వారిని విడిపించాడు. ఆ తరువాత తన ప్రజలుగా ఎలా జీవించాలో తెలియజేశాడు.

మొదటి ఆజ్ఞలో, “నేను తప్ప వేరొక దేవుడు నీకు ఉండకూడదు” అని చెప్పాడు. తమను విడిపించిన దేవుణ్ణి మాత్రమే ఆరాధించాలని, ఆయనకే విధేయులుగా జీవించాలని ఈ ఆజ్ఞ ద్వారా ఇశ్రాయేలీయులకు తెలియజేశాడు.

ఈ ఆజ్ఞ మన హృదయాలను కూడా పరిశీలించుకునేలా చేస్తుంది.

మనం ఇతర దేవతలను పూజించకపోవచ్చు. కానీ మన హృదయంలో దేవునికి చెందాల్సిన స్థానాన్ని మరేదైనా ఆక్రమిస్తోందా?

డబ్బు, ఉద్యోగం, పేరు, కుటుంబం వంటి విషయాలు మనకు దేవునికంటే ముఖ్యమైనవిగా మారుతున్నాయా? మన భద్రత, సంతోషం, భవిష్యత్తు వాటిపైనే ఆధారపడి ఉన్నాయని భావిస్తున్నామా? వాటికోసం దేవుని మాటకు అవిధేయత చూపించడానికి కూడా సిద్ధపడుతున్నామా?

దేవుడు మన బాహ్య ఆరాధనను మాత్రమే కాదు, మన హృదయాన్నంతటినీ కోరుతున్నాడు.

యేసుక్రీస్తు ప్రభువు ద్వారా దేవుడు మనలను పాపపు అధికారం నుండి విడిపించాడు (కొలస్సయులకు 1:13–14). మన విధేయత ద్వారా ఆయన రక్షణను సంపాదించుకోలేము. అయితే ఆయన కృపచేత రక్షించబడినవారిగా, మనలను విమోచించిన దేవుణ్ణి ప్రేమిస్తూ, ఆయనను మాత్రమే ఆరాధిస్తూ, ఆయనకు విధేయులుగా జీవించాలి.

ఈ రోజు మనల్ని మనం ప్రశ్నించుకుందాం: నా జీవితాన్ని నిజంగా నడిపిస్తున్నది ఎవరు? దేవుడా, లేక ఆయన స్థానంలో నేను ఉంచుకున్న మరేదైనానా?