ఆందోళనను ఎలా పోరాడాలి?

ఈ వాక్యభాగం గమనిస్తే "అందువలన... " తో ప్రారంభమైంది. క్రీస్తు , ధనము వలన కలిగే ఆందోళన గూర్చి మాట్లాడుతూ పలికిన మాటలివి(మత్తయి 6:19-24). ఇక్కడ ధనము ఒక కారణం కానీ ఇది ఆందోళనకి కారణమైన ప్రతి విషయానికి వర్తిస్తుందని మనం గమనించాలి. ఈ వాక్యభాగంలో "చింతింపకుడి" అని మూడు సార్లు చెప్పి , మనము ఎందుకు చింతించకూడదో ఐదు కారణాలు ఇచ్చారు.
1. పక్షులను, పువ్వులను పోషించే వాడు మన ప్రభువే ,తన ప్రాణాన్ని సైతం లెక్కచేయక మనకోసం ప్రాణం పెట్టిన వాడు మనలను మర్చిపోతాడా?
2. చింతించుటవలన ఏమి సాధించగలము ? ఇది అర్ధం లేని పని.
3. నిజ దేవుడు ఎవరో తెలియని వారు ఆందోళన చెందుతారు. దేవుడే ఎరిగిన ప్రజలుగా మనము ఎంత అభయము తో ఉండాలి!
4.మన అవసరాలు మనకంటే ఎక్కువగా తెలిసిన దేవుని మీద నమ్మకం ఉంచుదాం .
5. మనము అయన రాజ్యమును నీతిని మొదట వెదకుదాం ; అప్పు డవన్నియు మీకనుగ్రహింపబడును అని దేవుడు మనకి వాగ్దానం చేసాడు. మనం దీనిని విశ్వసించాలి.

దేనినిగూర్చియు చింతపడకుడి గాని ప్రతి విషయములోను ప్రార్థన విజ్ఞాపనములచేత కృతజ్ఞతాపూర్వకముగా మీ విన్నపములు దేవునికి తెలియజేయుడి. 7 అప్పుడు సమస్త జ్ఞానమునకు మించిన దేవుని సమాధానము యేసుక్రీస్తువలన మీ హృదయములకును మీ తలంపులకును కావలి యుండును.

ఫిలిప్పీయులు కూడా చాల రకాల ఆందోళనకు గురిఅయ్యారు . వారు బయట నుంచి వచ్చే వ్యతిరేకతతో (ఫిలిప్పీ 1:28 ) పాటు సంఘము లో వచ్చిన వ్యతిరేకతను( ఫిలిప్పీ 4:2 ) కూడా ఎదుర్కొన్నారు. మనము ఎదుర్కొనే సమస్యలని ఖచ్చితంగా ఈ కారణాలతో పోల్చుకోవచ్చు. ఫిలిప్పీ 4:6-7 లో పౌలు ఈ సమస్యను పోరాడుటకు మూడు విషయాలు చెప్పాడు. ఈ విషయాలు చెప్పేటప్పుడు పౌలు బహుశా మత్తయి 6:25-34 ని దృష్టి లో ఉంచుకొని ఉండవచ్చు.

మొదటిది, చింతించొద్దు అని చెప్తున్నాడు. ఇది దేవుని ఆజ్ఞ , మనము ఇది చేయనట్లయితే పాపము చేసినవారమౌతాము. చింతించడం పాపం అని గ్రహించడం ఆందోళనను అధిగమించడానికి మొదటి మెట్టు. అంతే కాక 1 పేతురు 5:7 లో అయన మనకు బదులుగా చింతించుచున్నాడు గనుక మన చింత యావత్తు ఆయనమీద వేద్దాం.

రెండొవదిగ, ప్రార్ధన చేయమని చెప్తున్నాడు. విజ్ఞాన శాస్త్రం ఆందోళనను ఎదుర్కోవడానికి యోగా, మసాజ్ , పాటలు వినడం వంటి సూచనలు ఇచ్చినప్పటికీ దేవుడు మనకిస్తున్న విరుగుడు ప్రార్థన. ఆందోళన వచ్చినప్పుడు మన మనస్సులు శాంతిని ,సమాధానాన్ని కోలుపోతాము. పౌలు, ప్రార్ధన చేసినప్పుడు మన సమస్యలు తీరిపోతాయని చెప్పట్లేదు కానీ సమాధానము మనకు లభిస్తుందని అంటున్నాడు . ఈ సమాధానము పరిశుద్దాత్మ దేవుడు మనకిచే వాగ్దానము తో కూడిన ఆశీర్వాదం. ఆందోళన చెందినపుడు మనము మర్చిపోయేదే ప్రార్ధన. ఒకవేళ ప్రార్ధన చేసినా, దేవుని మీద పూర్తిగా ఆదారపడకుండా చేస్తాము. ఇక్కడ ప్రశ్న ఏమిటంటే నువ్వు ప్రార్ధిస్తున్నావా? సమస్త జ్ఞానమునకు మించిన దేవుని సమాధానము మనకి ఇస్తాను అని వాగ్దానము చేసిన దేవుడు ఇవ్వక ఊరకుండునా?(మత్తయి 7:1). దేవుడు మనకిచ్చిన్న ఈ వాగ్దానాన్నీ గుర్తుతెచ్చుకొని ఈ సమస్యను ప్రార్థనాలో పోరాడుదాం. .

ఆకరిగా , పౌలు విజ్ఞాపనములచేత కృతజ్ఞతాపూర్వకముగా మన విన్నపములు దేవునికి తెలియజేయుమని చెప్తున్నాడు. బాధలో ఉన్నపుడు కృతజ్ఞత మనసు ఎలా వస్తుంది అన్నది మీ ప్రశ్నయితే , పౌలు తాను ఎక్కడ నుంచి ఈ లేఖ రాస్తున్నాడో గ్రహించాలి. పౌలు ఈ లేఖ రాస్తున్నప్పుడు జైలు లో సంకెళ్లతో బంధీగా ఉన్నాడు(ఫిలిప్పీ 1:12-14 ). కష్టాలలో ఉన్నపుడు, బాధ, చింతలో ఉన్నపుడు కృతజ్ఞతాపూర్వకముగా మన విన్నపాములు దేవుని యెదుట తెలియచేయాలని పౌలు మాటలలో స్పష్టముగా అర్ధమవుతుంది . 1 పేతురు 5:7 మరియు కీర్తనలు 55:22 లో కూడా మనము ఇదే చూస్తాము.

కనుక, ఒక్కమాటలో చెప్పాలంటే ఆందోళన కి విరుగుడు ప్రార్ధన. దేవుడు మనకిచ్చిన వాగ్దానాలను విశ్వసించి, ప్రార్ధన ద్వారా ఆందోళనను పోరాడుదాం. ప్రార్థన ద్వారా కలిగే సమాధానంతో భర్తీ చేసి, దేవుని మహిమకై జీవిద్దాం.

• #ఆందోళన