దేవుడు ప్రేమ కనుక ఎవరినైనా ఎలాగున్న ప్రేమిస్తాడా?

దేవుడు ఎంత గొప్పవాడో పూర్తిగా వివరించడం ఎవరికైనా సాధ్యమా? అది సముద్రపు నీటినంతటినీ ఒక చిన్న సీసాలో నింపాలనుకోవడం లాంటిదే. కానీ, బైబిల్ దేవుని గురించిన అద్భుతమైన సత్యాలను మనకు బయలుపరుస్తుంది.

వాటిలో మనకు బాగా నచ్చిన మాట: “దేవుడు ప్రేమాస్వరూపి” (1 యోహాను 4:8).

కానీ ఈ రోజుల్లో ‘ప్రేమ’ అనే మాటను లోకం చాలా చులకన చేసేసింది. సినిమాలు, పాటలు ప్రేమను కేవలం ఒక భావోద్వేగంగా చూపిస్తూ యువతను తప్పుదోవ పట్టిస్తున్నాయి. దురదృష్టవశాత్తూ, చాలామంది దేవుని ప్రేమను కూడా అదే లోకపు కంటితో చూస్తున్నారు. "దేవుడు ప్రేమగలవాడు కదా! ఆయన ఎవరినీ శిక్షించడు. నరకం అనేది కేవలం ఒక ఊహ మాత్రమే" అని వాదిస్తున్నారు. ప్రేమగల దేవుడు నరకాన్ని సృష్టించి మనుషులను శిక్షిస్తాడనేది వారు నమ్మరు. ఎందుకు ఈ అపోహ? ఎందుకంటే వారు దేవుని ప్రేమను మాత్రమే చూస్తూ, ఆయనకున్న మిగిలిన గుణాలను—ముఖ్యంగా ఆయన పరిశుద్ధతను మర్చిపోతున్నారు.

దేవుడు ప్రేమ అని చెప్పిన బైబిలే, ఆయన "పరిశుద్ధుడు" (లేవీయ 19:2) అని, "దహించు అగ్ని" (హెబ్రీ 12:29) అని కూడా స్పష్టంగా చెప్తోంది. ఆయన పాపాన్ని అస్సలు సహించలేని పవిత్ర నేత్రాలు గలవాడు (హబక్కూకు 1:13). మరి అలాంటప్పుడు, దేవుడు ఎవరినైనా, వారు ఎలా ఉన్నా సరే ప్రేమిస్తూనే ఉంటాడా?

ఖచ్చితంగా ప్రేమించడు! దేవుడు పాపాన్ని ఎన్నటికీ ప్రేమించలేడు. ఎందుకంటే ఆయన పూర్తిగా పరిశుద్ధుడు. దేవుడు వెలుగై ఉన్నాడు, ఆయనలో ఏమాత్రం చీకటి లేదు (1 యోహాను). "దేవుడు పాపులను ప్రేమిస్తాడు, పాపాన్ని ద్వేషిస్తాడు" అనే గాంధీగారి మాటను మనం తరచూ వింటూ ఉంటాం. కానీ బైబిల్ ఏం చెప్తోంది? పాపంతో నిండిన మనుషులలో దేవుడు ప్రేమించడానికి ఏముంది? "ఏ భేదమును లేదు; అందరును పాపము చేసి దేవుడు అనుగ్రహించు మహిమను పొందలేకపోతున్నారు" (రోమా 3:23). కాబట్టి, ఏ మనుషుడు కూడా తన సొంత యోగ్యతతో దేవుని ప్రేమను సంపాదించుకోలేడు (రోమా 3:20). దేవుని ప్రేమకు సంపూర్ణంగా అర్హుడు ఆయన ప్రియ కుమారుడైన యేసుక్రీస్తు ఒక్కడే (మత్తయి 4:17).

పాపంలోనే జీవిస్తూ, పశ్చాత్తాపం, మారుమనస్సు, రక్షణ లేకుండా దేవుడు నన్ను ప్రేమిస్తున్నాడని అనుకుంటే అది చాలా పెద్ద పొరపాటు.

కానీ ఇక్కడే దేవుని ఆశ్చర్యకరమైన కృప కనిపిస్తుంది. దేవుడు పాపులమైన మనలను ప్రేమించాడు. ఏ పాపము లేని తన పరిశుద్ధ కుమారుడైన యేసుప్రభువును మన పాపాలకు "ప్రాయశ్చిత్తంగా" (అనగా మన పాపశిక్షను తీసివేయడానికి బలిగా) ఈ లోకానికి పంపాడు. ఇదే నిజమైన ప్రేమ (1 యోహాను 4:10). యేసుప్రభువు సిలువపై మన స్థానంలో నిలబడి, మనకు రావలసిన పాప శిక్షను అనుభవించారు. అందుకే, ఇప్పుడు క్రీస్తు ద్వారానే దేవుడు మనలను ప్రేమిస్తున్నాడు. విశ్వాసులమైన మన ధైర్యం ఏంటంటే—మనం క్రీస్తుతో ఐక్యమై ఉన్నాము (క్రీస్తు నందు ఉన్నాము) గనుకనే దేవుడు మనలను ప్రేమిస్తున్నాడు. మన భక్తి, మన సేవ, మన మంచి పనులు దేవుని ప్రేమను ఏమాత్రం ఆకర్షించలేవు. అపొస్తలుడైన పౌలు తన పత్రికలలో "క్రీస్తు నందు" అనే మాటను దాదాపు 75 సార్లు వాడటానికి కారణం ఇదే!